Af AutoCad og sænskri kvikmynd

 Það er eilítið dauður tími í vinnunni núna. Hef einkum verið að dunda mér við smá villuleit í AutoCad, og að reyna að samhæfa forritið við mælitækin. Töluvert leiðinlegra en það hljómar, sérstaklega þar sem hvorki gengur né rekur.

Fjári góð þessi sænska mynd sem var á Stöð 2 í nótt. Sat límdur við skjáinn til hálfþrjú. Þreytustigið í dag er alveg í samræmi við það.

 

Áfram um einbreiðar brýr.

Það er margt athyglisvert að finna á heimasíðu Vegagerðarinnar. T.d. er þar að finna Brúaskrá, þar sem upplýsingar um allar brýr á áhrifasvæði vegagerðarinnar er að finna. Þegar maður er búinn að lesa aðeins úr skránni kemur eftirfarandi í ljós:

Fjöldi einbreiðra brúa á Þjóðvegi 1. (Þar með taldar brýr með útskotum) Skráin er reyndar frá 2005, þ.a. eftirfarandi upplýsingar eru með þeim fyrirvara.

• Reykjavík-Akureyri: 5 stk, þar af 4 sem verða aflagðar í lok sumars.
• Akureyri-Biskupsháls: 2 stk. Aftur mega glöggir giska á hvað brýr þetta eru.
• Biskupsháls-Egilsstaðir: 3 stk.
• Egilsstaðir-Berufjarðarbotn (Um Breiðdalsheiði): 12 stk, þar af 6 í Skriðdal, og 4 í Breiðdal. Ég held reyndar að ein hafi verið aflögð í Skriðdalnum nú í sumar.
• Berufjarðarbotn-Þvottárskriður: 6 stk á tæplega 50 km kafla.
• Þvottárskriður-Skeiðarárbrú: 16 stk. (Skeiðarárbrúin meðtalin)
• Skeiðarárbrú-Kirkjubæjarklaustur: 7 stk
• Kirkjubæjarklaustur-Reykjavík: 1 stk.

Það er nokkuð ljóst að ég hef talið eitthvað vitlaust í fyrra skiptið, því nú er ég að fá 35 einbreiðar brýr á leiðinni Skeiðará-Biskupsháls. Einnig sést við nánari skoðun að ég get lengt mörkin á getrauninni úr síðustu færslu frá Vík til Kirkjubæjarklausturs. Minni aftur á hana, það væri gaman að fá ágiskanir.

I.Sk.

Dágóður rúntur

Ég flaug sem sé austur á land að ná í bíl. Ég keyrði að sjálfsögðu suðurleiðina í bæinn, og loksins, loksins hafa verið gerðar einhverjar vegabætur á þessari leið. Búið var að malbika smáspotta í Skriðdalnum, og einnig var komið slitlag á hluta af því sem upp á vantar í Hamarsfirði. Prýðilegir vegir, báðir tveir.

 Þetta svæði hefur verið afskipt í gegnum tíðina, en nú horfir svo sannarlega til betri vegar í bókstaflegri merkingu. Öxi loksins komin á samgönguáætlun, og einhverjar framkvæmdir fyrirhugaðar í Hvalnes- og Þvottárskriðum, en ég er ekki viss í hverju þær felast. Vona að þar sé malbik á ferðinni, þó svo að þar sé kannski tjaldað til einnar nætur. Göng undir Lónsheiði koma, fyrr eða síðar, og þá verður vegurinn um skriðurnar aflagður.

Mig langar að fara aðeins yfir það sem upp á vantar á þessari leið, til þess að vegurinn geti talist þokkalega nútímalegur:

• 4-5km kafli í Hamarsfirði sem eftir á að malbika. Ég er reyndar ekki viss hvort búið er að uppfæra tölur Vegagerðarinnar til samræmis við nýlegar framkvæmdir, þ.a. þetta gæti verið styttra.
• 3-4km í Berufirði, frá Lindarbrekku inn í Fjarðarbotn. (Og reyndar annað eins norðanmegin í firðinum, svo Fjarðamenn séu sáttir, en það er ekki á þeirri leið sem ég er að fjalla um)
• Hvalnes- og Þvottárskriður. Afskaplega leiðinlegur og hættulegur kafli. Hugsanlegt að það þurfi jarðgöng til að nútímavæða veginn, en látum það ráðast.
• Axarvegur. Ef allt gengur að óskum ætti að vera kominn þarna þokkalegasti vegur innan 5 ára. Þó fyrr hefði verið.
• Skriðdalur. Olnbogabarn Vegagerðar ríkisins, með ótal blindbeygjum, blindhæðum, og einbreiðum brúm. Ótrúlegt að það er fyrst núna sem verið er að gera eitthvað við þennan veg. Betra er seint en aldrei.
• Einbreiðar brýr. Ég taldi saman mér til gamans hversu margar einbreiðar brýr væru á þjóðvegi 1 frá Skeiðarársandi yfir á Biskupsháls. 33 kvikindi takk fyrir. Til gamans má geta að frá Reykjavík til Víkur í Mýrdal er aðeins ein einbreið brú á Þjóðvegi 1. Glöggir menn mega gjarnan giska á yfir hvaða á sú brú liggur. Til þess er kommentakerfið.

Lifið heil

 

O jæja

Ég er ekki búinn að fara neitt um verslunarmannahelgina, nema hvað að ég fór aðeins upp í Borgarfjörð að vinna, mældi þar einn skurð, og rak niður nokkra hæla. Til þess að komast þangað þurfti ég að aka eftir einhverjum albesta þvottabrettisvegi sem ég hef nokkurn tímann keyrt. Fyrir þá sem til þekkja, þá er þetta þjóðvegur 505, Melasveitarvegur. Ég reikna ekki með að hann verði malbikaður í bráð, enda aðeins fáeinir bændur sem nota þennan veg að staðaldri. En það mætti svo sannarlega hefla kvikindið.

Ég horfði á myndina Man of the Year í gærkvöldi. Prýðismynd í alla staði, Robin Williams fer á kostum, og Walken er fjandi góður líka.

Smá spjall

Ég átti erindi áðan til Vegagerðarinnar vega vinnunnar, og átti þar smá spjall við starfsmann um vegamál á Suðurnesjum. Eins og einhverjir vita er í bígerð að klára Suðurstrandarveg, og eins skilst mér að verið sé að vinna í Nesveginum. Staða vegarins hjá Kleifarvatni barst í tal og ég benti þessum ágæta manni á að þegar Suðurstrandarvegurinn væri tilbúinn, lægi beint við að tjarga Kleifarvatnsveginn líka. Þessi leið gæti þá létt aðeins á Hellisheiðinni á álagstímum. Einnig benti hann mér á að umferð væri töluverð um þennan veg nú þegar, og þá að stórum hluta ferðamenn á leið frá bláa lóninu og til Reykjavíkur. Svo er nánast óþarfi að taka fram hvað þetta myndí þýða fyrir Grindvíkinga. Þarna er dæmi um framkvæmd sem kostar tiltölulega lítið á kílómetrann, og er fljótt á litið umtalsvert þjóðhagslega hagkvæm.

Hvað er í gangi?

Svona rétt fyrir þá sem telja uppbyggingu Axarvegar misráðna. Reyndar er þessi tala með hæsta móti, en samanburðurinn við t.d. Oddsskarð er athyglisverður engu að síður.

Forgangsröðun í samgöngumálum

Þetta er undarleg frétt. Þarna virðist sem sveitarfélagið sé búið að ákveða einhliða að grafa jarðgöng, og ekki bara ein, heldur tvenn. Þetta vekur upp spurningar um hversu mikilvægt er að fá göng á þessum tiltekna stað. Nú er ég ekki vel kunnugur staðháttum, en ég veit þó að þarna er ófært einhverja daga á ári, einkum vegna hálku og sviptivinda. Þarna er kannski ekki svo vitlaust að grafa göng.

En eru ekki aðrir staðir þar sem er meiri þörf á að lagfæra og nútímavæða vegakerfið. Mér dettur helst í hug Hvalnesskriður, Hamarsfjörður, Berufjörður, Skriðdalur. Allt eru þetta kaflar á Þjóðvegi 1 sem eftir á að malbika. Glöggir sjá að þetta eru allt staðir á sunnanverðum Austfjörðum, og ég er viss um að Norðlendingar og Vestfirðingar geta bætt við þennan lista. Jafnvel þó þessi göng væru gagnleg ef til kæmi, þá er klárt mál að fjármununum er betur varið annarsstaðar.

Andmæla flutningi þjóðvegar 1 um Mýrdal

Nýtt og leiðinlegt blogg

Þá er maður kominn á moggabloggið. Það er ekki úr vegi að fara að byrja að blogga aftur eftir nokkurt hlé. Ég er hins vegar að hugsa um að hafa þetta blogg leiðinlegt, hér verða því eingöngu þankar um dægurmál, en engir fyndnir tenglar, né heldur súrrealískar pælingar sem tíðkuðust á eldra bloggi. Athugasemdir eru velkomnar, en ég geri þá kröfu að þær séu annaðhvort málefnalegar eða fyndnar, og áskil mér rétt til að eyða athugasemdum sem uppfylla ekki þessi skilyrði.

Ég er með smá hugleiðingu um samgöngumál í bígerð, og vonandi get ég sett hana inn í kvöld ef vel liggur á mér.

Ég lenti nýverið í smá rökræðu við kauða sem kallar sig Hnoðra, og þeir sem vilja kíkja á þá þanka geta fundið þá á hnodri.blog.is.

Svo er eins víst að ég nenni engan veginn að blogga. Þá verður bara að hafa það.

I.Sk.